https://youtu.be/bC8uXyeEk0w?si=APD_jCSxZ02Xcll9
ਸਿਹਤ ਵਿਭਾਗ ਦੀ ਮਿਲਾਵਟਖੋਰੀ ਖ਼ਿਲਾਫ਼ ਵੱਡੀ ਕਾਰਵਾਈ
ਲੁਧਿਆਣਾ ਵਿੱਚ ਸਿਹਤ ਵਿਭਾਗ ਨੇ ਮਿਲਾਵਟਖੋਰੀ ਖ਼ਿਲਾਫ਼ ਵੱਡੀ ਕਾਰਵਾਈ ਕਰਦੇ ਹੋਏ ਗਿੱਲ ਚੌਂਕ ਦੇ ਨੇੜੇ ਇੱਕ ਦੁਕਾਨ ‘ਤੇ ਛਾਪਾ ਮਾਰਿਆ। ਇੱਥੋਂ ਕਰੀਬ 1500 ਕਿਲੋਗ੍ਰਾਮ ਸੰਦੇਹਾਸਪਦ ਦੇਸੀ ਘੀ ਬਰਾਮਦ ਕੀਤਾ ਗਿਆ, ਜੋ ਕਿਸੇ ਹੋਰ ਰਾਜ ਤੋਂ ਮੰਗਵਾ ਕੇ ਸਪਲਾਈ ਕਰਨ ਲਈ ਰੱਖਿਆ ਗਿਆ ਸੀ। ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਕੁਝ ਸਮਾਨ 2024 ਵਿੱਚ ਹੀ ਐਕਸਪਾਇਰ ਹੋ ਚੁੱਕਾ ਸੀ।ਇਸ ਕਾਰਵਾਈ ਦੌਰਾਨ ਸਿਹਤ ਵਿਭਾਗ ਦੀ ਟੀਮ ਨੇ ਗੁਪਤ ਸੂਚਨਾ ਦੇ ਆਧਾਰ ‘ਤੇ ਅਚਾਨਕ ਰੇਡ ਕੀਤੀ ਅਤੇ ਲਗਭਗ 1500 ਕਿਲੋ (15 ਕਵਿੰਟਲ) ਦੇਸੀ ਘੀ ਜ਼ਬਤ ਕੀਤਾ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇੱਥੇ ਦੋ ਸਾਲ ਪਹਿਲਾਂ ਐਕਸਪਾਇਰ ਹੋ ਚੁੱਕਾ ਸਮਾਨ ਵੀ ਬੇਝਿਝਕ ਸਪਲਾਈ ਲਈ ਤਿਆਰ ਰੱਖਿਆ ਗਿਆ ਸੀ।
ਦੂਜੇ ਰਾਜਾਂ ਤੋਂ ਮੰਗਵਾ ਕੇ ਲੁਧਿਆਣਾ ਵਿੱਚ ਖਪਾਉਣ ਦੀ ਸੀ ਯੋਜਨਾ
ਸ਼ੁਰੂਆਤੀ ਜਾਂਚ ਵਿੱਚ ਪਤਾ ਲੱਗਿਆ ਹੈ ਕਿ ਘੀ ਦੀ ਇਹ ਵੱਡੀ ਖੇਪ ਦੂਜੇ ਰਾਜ ਤੋਂ ਮੰਗਵਾਈ ਗਈ ਸੀ ਅਤੇ ਇਸਨੂੰ ਲੁਧਿਆਣਾ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਸਪਲਾਈ ਕਰਨਾ ਸੀ। ਸਿਹਤ ਵਿਭਾਗ ਨੂੰ ਇਸ ਬਾਰੇ ਗੁਪਤ ਸੂਚਨਾ ਮਿਲੀ ਸੀ, ਜਿਸ ਤੋਂ ਬਾਅਦ ਖਾਦ ਸੁਰੱਖਿਆ ਅਧਿਕਾਰੀ ਯੋਗੇਸ਼ ਗੋਯਲ ਅਤੇ ਜਤਿੰਦਰ ਵਿਰਕ ਦੀ ਟੀਮ ਨੇ ਛਾਪੇਮਾਰੀ ਕੀਤੀ। ਜਾਂਚ ਦੌਰਾਨ ਸਟਾਕ ਵਿੱਚ ਕਾਫੀ ਗੜਬੜੀਆਂ ਸਾਹਮਣੇ ਆਈਆਂ। ਕੁਝ ਪ੍ਰੋਡਕਟਸ ਦੀ ਐਕਸਪਾਇਰੀ ਮਿਤੀ 2024 ਦੀ ਸੀ, ਪਰ ਉਹ ਹਟਾਏ ਨਹੀਂ ਗਏ ਸਨ। ਅਧਿਕਾਰੀਆਂ ਮੁਤਾਬਕ ਐਕਸਪਾਇਰ ਸਮਾਨ ਨੂੰ ਵੀ ਮਾਰਕੀਟ ਵਿੱਚ ਵੇਚਣ ਦੀ ਤਿਆਰੀ ਕੀਤੀ ਜਾ ਰਹੀ ਸੀ, ਜੋ ਲੋਕਾਂ ਦੀ ਸਿਹਤ ਨਾਲ ਵੱਡਾ ਖੇਡ ਹੈ।
ਅਧਿਕਾਰੀਆਂ ਦਾ ਕਹਿਣਾ – ਲੋਕਾਂ ਦੀ ਸਿਹਤ ਨਾਲ ਨਹੀਂ ਹੋਵੇਗਾ ਖਿਲਵਾੜ
ਟੀਮ ਨੇ ਮੌਕੇ ਤੋਂ ਕੁੱਲ ਚਾਰ ਸੈਂਪਲ ਲੈ ਕੇ ਲੈਬ ਵਿੱਚ ਜਾਂਚ ਲਈ ਭੇਜੇ ਹਨ, ਜਿਨ੍ਹਾਂ ਵਿੱਚ ਦੇਸੀ ਘੀ ਦੇ 2 ਸੈਂਪਲ, ਸਕਿਮਡ ਮਿਲਕ ਦਾ 1 ਸੈਂਪਲ (ਜੋ ਐਕਸਪਾਇਰ ਸੀ) ਅਤੇ ਮਲਟੀ-ਸੋਰਸ ਕੁਕਿੰਗ ਆਇਲ ਦਾ 1 ਸੈਂਪਲ ਸ਼ਾਮਲ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਲੋਕਾਂ ਦੀ ਸਿਹਤ ਨਾਲ ਖਿਲਵਾੜ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਵਿਭਾਗ ਸੁਰੱਖਿਅਤ ਅਤੇ ਗੁਣਵੱਤਾ ਵਾਲੇ ਖਾਦ ਪਦਾਰਥ ਯਕੀਨੀ ਬਣਾਉਣ ਲਈ ਵਚਨਬੱਧ ਹੈ ਅਤੇ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਿਆਂ ਖ਼ਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
Leave a Reply